Publiser nettsida di på Internett

No har du laga din eigen nettstad. Du vil vel vise det fram, gjer du ikkje?

Hugsar du serverane frå den fyrste øykta? Serverar er datamaskiner som alltid er på og kopla til Internett, og dei er sett opp slik at folk kan besøke nettstader som lev på desse datamaskinene.

For å leggje nettsida vår på Internett skal me bruke Github Pages. Det er det Kodeklubben brukar: kodeklubben.github.io. For at du skal kunne gjere det må du fyrst ha ei epost-adresse. Du kan lage din eigen (Gmail), bruke den du har på skulen, eller spørje om å låne foreldra dine sin. Det er viktig at du hugsar kva epost du har brukt, og at du har tilgang på innboksen slik at du får godkjent brukaren på GitHub.

Github

GitHub er ein samarbeidsplattform for oss som driv med programmering. Her kan me leggje ut prosjekt som andre kan hjelpe til med, eller me kan finne eit prosjekt me kan bidra på. Slik kan me enkelt hjelpe, samarbeide og dele med alle andre som driv med programmering i verda. No skal me lage ein GitHub-brukar.

Gå inn på Github.com.
Skriv inn Username (brukarnamn), epost og password (passord) før du trykkar Sign up for Github (sjå biletet under).

§Bilete av GitHub-nettsida
Følg instruksjonane vidare for å godkjenne og lage ferdig brukaren din.

Brukarnamn.github.io

No som me har ein Github-brukar kan me registrere ei github.io-side.

Logg inn på Github.com med den nye brukaren din viss du ikkje allereie er logga inn.
Trykk på New repository (ein grøn knapp oppe til venstre, eller under + øvst i høgre hjørne).
Under Repository name skriv du ditt-brukarnamn.github.io. Under ser du korleis me gjorde det for kodeklubben.github.io.
Du kan gjerne skrive ei beskriving av nettsida under Description.
Som standard er repository-et Public (alle kan sjå koden din). For å velje Private (koden til nettsida blir privat) må du betale for det. Me har valt Public.
Trykk Create repository (lag oppbevaringsstad).

No skal me laste ned repository-et eller repo-et vårt, altså oppbevaringsstaden for koden til nettsida vår. Denne koden legg me i ei mappe lokalt på datamaskina vår. I denne mappa legg me inn alle filene som skal brukast til nettsida, og me brukar programmet eller kommandolinja til GitHub for å laste opp kode til ditt-brukarnamn.github.io-sida vår.
Trykk på Set up in Desktop:

Viss du er vant til å bruke kommandolinja til Linux eller Mac OS X, så kan du gjere det som står under ...or create a new repository on the command line.
Du kjem til å få spørsmål om å laste ned Github-programmet. Takk ja til det.
Trykk Tillat på eventuelle ting som dukkar opp når Github-programmet åpnar seg:
Viss du får spørsmål om å logge inn, så loggar du berre inn med Github-brukaren du laga i stad.
No får du spørsmål om å leggje mappa ditt-brukarnamn.github.io ein stad lokalt på datamaskina. Legg det ein stad der du finn det att. Til dømes på Skrivebordet eller i Mine dokument.

For ikkje å øydeleggje noko på kodeklubben.github.io blir dei neste stega vist med brukaren larsfk.github.io.

No er det endeleg på tide å laste opp den fyrste fila til heimesida!
Åpne mapp ditt-brukarnamn.github.io. Her heiter mappa larsfk.github.io og ligg på Skrivebordet.
Åpne favoritt-teksteditoren din (Atom, NodePad, Brackets IO, NodePad++).
Lag index.html og lagre den i mappa ditt-brukarnamn.github.io. Dette skal vere startsida til nettsida vår.

Skriv noko HTML i index.html. Du kan gjerne kopiere ei av sidene du allereie har laga før. Viss du ikkje veit kva du skal skrive kan du til dømes skrive noko som:

<!DOCTYPE html>
<html>
    <body>
        <h1>Mi fyrste heimeside!</h1>
        <p>Denne heimesida er laga med GitHub Pages.</p>
    </body>
</html>

No skal me laste opp denne fila til ditt-brukarnamn.github.io.

Oppdater ditt-brukarnamn.github.io

Åpne Github-programmet.
Trykk på ditt-brukarnamn.github.io i kolonna til venstre.
Trykk på Compare.

Når du trykkar på Compare vil Github starte å samanlikne det som ligg i mappa ditt-brukarnamn.github.io med det som ligg på nettsida ditt-brukarnamn.github.io. Alt som er grønt er det som er lagt til og alt som blir raudt er ting som er fjerna. I biletet over er det berre ny kode, difor er koden grøn.
Du må committe endringane du har gjort før du får lagt opp fila til Github-en din. For å gjere det skriv du ei kort forklaring i Summary, og kanskje ei litt meir detaljert beskriving av kva som er gjort i Description, slik som på biletet over.
Trykk på Commit to master når du har skrive om endringane du har gjort.
No kan du trykkje på Publish øvst til høgre.
Viss du får spørsmål om å tillate ein operasjon, så gjer det.
Nå ser me (sjå biletet over) at ein commit er lagt til og pusha (lasta opp) til sida vår. Gå inn på ditt-brukarnamn.github.io (larsfk.github.io her) for å sjå heimesida di!

NB! Stega over må du gjere kvar gong du skal oppdatere nettsida di!

Gratulerer med ny heimeside! Denne kan du dele med kven du vil ved å sende lenka ditt-brukarnamn.github.io.

Vil du lære meir om GitHub?

GitHub er stort og kan vere komplisert og vrient i starten. Viss du vil lære meir, sjekk ut tipsa under:

Les meir om GitHub her: https://www.atlassian.com/git/tutorials eller på Kodeklubbens wiki.

Søk på GitHub Tutorials på YouTube, til dømes GitHub for noobs.

Forbedre denne siden

Funnet en feil? Kunne noe vært bedre?
Hvis ja, vennligst gi oss tilbakemelding ved å lage en sak på Github eller fiks feilen selv om du kan. Vi er takknemlige for enhver tilbakemelding!

Rapporter et problem

Gå til forumet

Vis koden og fiks selv