Steg 0: Installere Pygame Zero

For å gjere denne oppgåva må du installere Pygame Zero. Start med å sjekke at du har installert Python 3, altså at Python-versjonen din er nummerert på forma 3.X.X.

Åpne kommandolinja (engelsk: command prompt) på datamaskina di. Brukar du Windows kan du åpne start-menyen og skrive cmd (eventuelt Ledetekst, som er det norske namnet på programmet som skal køyre). På Mac og Linux åpnar du terminalvindauget. Skriv inn følgjande:

Windows og Mac:

pip install pgzero

Linux:

sudo pip install pgzero

Nokre Linux-system kallar den pip3, i så fall må du skrive det i staden for pip i koden over. Viss pip ikkje er installert kan du prøve å skrive

sudo python3 -m ensurepip

før du prøver sudo pip install pgzero att.

Steg 1: Høgde og breidde

• Lag eit nytt Python-program med følgjande kode:

import pgzrun

HEIGHT = 400
WIDTH = 600

pgzrun.go()

• Køyr programmet og sjå kva som skjer. Du skal sjå eit svart vindauge som er 400 pikslar høgt, og 600 pikslar breitt.

Ein piksel er eit lyspunkt på skjermen og nøyaktig kor stort dette lyspunktet er avhenger av kva skjerm du har - så det kan vere at vindauget får ulik storleik på andre datamaskiner enn din.

Steg 2: Lag ein ball!

• Me skal lage ein ball som me kan vise på skjermen. Me startar med å lage ei Ball-klasse, som har variablane radius og color, og ein posisjon som består av x og y.

COLORS = {
    'red': (255, 0, 0),
    'green': (0, 255, 0),
    'blue': (0, 0, 255),
    'white': (255, 255, 255),
    'black': (0, 0, 0)
}

class Ball:
    radius =  20
    color = COLORS['red']
    x = WIDTH // 2
    y = HEIGHT // 2

Her har me valt å ha ein raud ball, men du kan velje ei anna farge frå COLORS-ordboka viss du vil det. Hugs at // tyder 'heiltalsdivisjon', det vil seie at svaret blir runda av nedover, slik at me får eit heiltal som svar.

• I tillegg må me ha ein funksjon som kan teikne ballen vår. Denne skal me kalle draw(). Hugs at funksjonane som skal vere ein del av klassa må ha eit innrykk. Me må endre på klassa så den ser slik ut:

class Ball:
    radius = 20
    color = COLORS['red']
    x = WIDTH // 2
    y = HEIGHT // 2

    def draw(self):
        screen.draw.filled_circle((self.x, self.y), self.radius, self.color)

No er du nesten ferdig. Me må lage eit Ball-objekt, ball1 og ein global draw-funksjon. Dette vil sjå slik ut:

ball1 = Ball()

def draw():
    screen.clear()
    ball1.draw()

Prosedyra screen.clear() syt for at me teiknar på ein blank skjerm, og må alltid kome fyrst i den globale funksjonen draw().

Steg 3: Rørsle

• Me vil at ballen vår skal bevege seg. Korleis skal me få til dette? Me lagar funksjonen update().

• Fyrst må me legjge til eit par variablar som bestemmer farta på ballen. Me skal ha ein variabel for farta i y-retning og ein variabel for farta i x-retning.

class Ball:
    radius =  20
    color = COLORS['red']
    x = WIDTH // 2
    y = HEIGHT // 2
    speed_x = 3
    speed_y = 3

• Så må me lage ein funksjon update() som er ein del av Ball. Denne syt for at ballen beveger seg speed_x pikslar i x-retninga, og speed_y i y-retninga.

class Ball:
    # ...

    def update(self):
        self.x += self.speed_x
        self.y += self.speed_y

• I tillegg må me ha ein global funksjon update() som kallar ball1.update():

def update():
    ball1.update()

Steg 4: Veggkollisjonar

Me vil la ballen sprette tilbake når den treff ein vegg. Her er det eit par ting me må tenke på: korleis oppdagar me at ballen treff, og korleis kan me endre variablane slik at den sprett vekk frå veggen? Ballen sin posisjon er bestemt av x og y, men den har òg ein radius som me må ta omsyn til når me skal oppdage om ballen treff veggen. Når ballen treff den øvste eller nedste veggen vil me at farta blir reversert i y-retning, det samme gjeld for farta i x-retning når me treff høgre eller venstre vegg.

• Me må endre update()-funksjonen i Ball-klassa:

class Ball:
    # ...

    def update(self):
        self.x += self.speed_x
        self.y += self.speed_y

        # sjekkar for kollisjon i x-retning
        if self.x + self.radius >= WIDTH or self.x - self.radius <= 0:
            self.speed_x = -self.speed_x

        # sjekkar for kollisjon i y-retning
        if self.y + self.radius >= HEIGHT or self.y - self.radius <= 0:
            self.speed_y = -self.speed_y

Steg 5: Styre farta til ballen

Me skal la brukaren styre farta til ballen ved hjelp av piltastane. Når brukaren trykkar på 'Pil opp' skal ballen gå raskare oppover (eventuelt mindre fort nedover), det motsette skal skje om brukaren trykkar 'Pil ned'. Det same skal skje viss brukaren trykkar på 'Pil høgre' eller 'Pil venstre', men då skal fartsendringa skje i x-retning.

• For å få til dette skal me lage ein on_key_down()-funksjon i Ball-klassa:

class Ball:
    # ...

    def on_key_down(self, key):
        if key == keys.LEFT:
            self.speed_x -= 1
        elif key == keys.RIGHT:
            self.speed_x += 1
        elif key == keys.UP:
            self.speed_y -= 1
        elif key == keys.DOWN:
            self.speed_y += 1

Legg merke til at funksjonen har ein parameter, key, som brukast til å avgjere kva tast brukaren trykka på.

• Me treng òg ein global on_key_down()-funksjon. Denne har òg ein key-parameter, som blir sendt videre til ball1.on_key_down().

def on_key_down(key):
    ball1.on_key_down(key)