Sjekkliste

• Start eit nytt PXT-prosjekt, til dømes ved å gå til makecode.microbit.org.

• Me vil at det skal skje noko når me ristar på micro:biten. For å få til det kan me bruke når ristes-klossen som du finn i kategorien Inndata.

• Aller fyrst vil me berre sjå at me får til å vise talet 1. For å vise tal brukar me vis tall-klossen i Basis-kategorien.

• Set saman desse to klossane slik at skriptet ditt ser slik ut:

  input.onGesture(Gesture.Shake, function () {
  basic.showNumber(1)
  })
  

Sjekkliste

• Før me kastar ein vanleg terning veit me ikkje kva resultatet kjem til å bli. Me veit at det kan bli anten 1, 2, 3, 4, 5 eller 6, men ikkje kva tal terningen landar på. Eit slik resultat kallar me eit tilfeldig tal. Tilfeldige tal kan me lage på micro:biten med klossen velg tilfeldig 0 til 4 i Matematikk-kategorien.

• Prøv å leggje velg tilfeldig-klossen inn i koden din sjølv, slik at det tilfeldige talet blir vist i staden for 1 som me fekk opp før.

• Bruk simulatoren eller last ned koden til micro:biten din for å teste, slik du gjorde i stad. Når du ristar på micro:biten (eller klikkar på SHAKE) skal det bli laga nye tilfeldige tal. Rist fleire gonger. Forandrar talet seg?

• Ein vanleg terning viser tala 1, 2, 3, 4, 5 og 6. Viss du brukte velg tilfeldig 0 til 4-klossen vel micro:biten mellom tala 0, 1, 2, 3 og 4. Korleis kan me få micro:biten til å velje mellom tala 1 til 6?

Sjekkliste

• Me kan få micro:biten til å oppføre seg som ein rullande terning ved å vise forskjellige tal før den til slutt stoppar på eitt av dei.

  For å gjere ein ting fleire gonger brukar me løkker. Hent klossen gjenta 4 ganger frå Løkker-kategorien. Legg den rundt vis tall-klossen på denne måten:

  input.onGesture(Gesture.Shake, function () {
    for (let i = 0; i < 4; i++) {
        basic.showNumber(Math.randomRange(1, 6))
    }
  })
  

• Test programmet ditt att. Forstår du kva gjenta-løkka gjer? Prøv å endre dei ulike tala i koden din. Kva blir annleis når du ristar micro:biten?

Sjekkliste

• Når me programmerer brukar me variablar til å hugse ting for oss. La oss lage ein variabel som kan hugse det siste terningkastet:

  Klikk på Variabler-kategorien og så på knappen Lag en variabel. Gi den nye variabelen namnet terning og klikk OK. Du vil sjå at det dukkar opp ein kloss som heiter terning i Variabler-kategorien.

  

• For å bruke den nye variabelen kan me bestemme kva den skal hugse med sett variabel til 0-klossen. La oss endre skriptet vårt slik at terning hugsar kvart terningkast. Legg til og flytt på klossane så skriptet ditt ser slik ut:

  let terning = 0
  input.onGesture(Gesture.Shake, function () {
    for (let i = 0; i < 4; i++) {
        terning = Math.randomRange(1, 6)
        basic.showNumber(terning)
    }
  })
  

Viss du testar prosjektet ditt no skal det oppføre seg likt som før! Men denne endringa gir oss nye moglegheiter! Sidan me no veit resultatet av terningkastet, så kan me til dømes vise eit smilefjes kvar gong me kastar 6:

• Med klossen vis bilde som du finn i Basis-kategorien kan me sjølv bestemme biletet som visast på skjermen til micro:biten. Prøv å teikne eit smilefjes (eller eit anna bilete du heller vil bruke).

• For å samanlikne to ting brukar me klossar frå Logikk-kategorien. Her vil me samanlikne resultatet av terningkastet med talet 6. Me kan seie at hvis terning = 6 skal me vise biletet smilefjes.

  Prøv å pusle saman klossar frå Logikk- og Variabler-kategoriane som seier hvis terning = 6.

• Me vil sjekke om resultatet av terningkastet var 6 etter at terningen har rulla ferdig. Det vil seie at me må leggje hvis-klossane etter løkka me laga tidlegare. Til slutt ser programmet ditt om lag ut som dette:

  let terning = 0
  input.onGesture(Gesture.Shake, function () {
    for (let i = 0; i < 4; i++) {
      terning = Math.randomRange(1, 6)
      basic.showNumber(terning)
    }
    if (terning == 6) {
      basic.showIcon(IconNames.Happy)
    }
  })
  

Fleire idear

No har du lært korleis micro:biten kan kaste terning. Men det finst mange måtar du kan vidareutvikle det på. Under finn du nokre idear, men finn gjerne på noko heilt sjølv!

• Kan terningen vise terningsymbol i staden for tal? Til dømes, viss du kastar 1 visast ein prikk på skjermen, kastar du 2 får du to prikkar og så bortetter.

• Med micro:biten kan du kaste to eller fleire terningar samstundes! Lag fleire terning-variablar, og vis summen av dei til slutt.

• Kanskje du kan bruke A- eller B-knappen til å bestemme kor mange terningar som skal bli kasta? Då treng du ein variabel, antal kast, og ei løkke som blir gjenteke antal kast gonger.